الشهرة ضد الحرية: رأي المورفين في ثمن النجاح
مقدمة: مشكلة الشهرة - تحليل مقطع من طراك فوندو
موضوع الشهرة وعلاقتها بحرية الفرد موضوع غني بزاف فلسفيا وكيهم بزاف ديال المجالات: النفس، المجتمع، وحتى الأخلاق. وفهاد المقال ختارينا ليكم واحد من أحسن الروابا لي كيكتبو فالمغرب مهدي مهيب، الملقب بلمورفين، ولا لمورفو. هو راپور مغربي تزاد عام 1984 ف سلا وعاش فمدينة ميدلت ومكناس ف الطفولة والمراهقة ديالو.
المورفين معروف ب لميطافور ولإيڭو تريپ ف طراكات ديالو. المورفين شيخ الراب لي كيقول فهاد الطراك تحديدا، أنه كيعيش الراب فحياتو ماشي غا كيكتبو، داكشي علاش كيبان أنه هو لي كيديرو حسن. وهنا كيان أن المورفين كياخد معاه الفن ديالو لي هو الراب للحياة ديالو وميمكنش يخليه غا فاستوديو ولا مواقع التواصل الاجتماعي والستريمات، بل جزء من حياتو والهوية ديالو.
وهادشي طبعا ينتج عنه بزاف ديال النتائج منها الإيجابية والسلبية، وهذا هو موضوعنا لهذا المقال: الشهرة وكيفاش أنها تقدر تسلب الإنسان الحرية ديالو وميبقاش ديال راسو، ويضطر أنه يهز لهبال للجمهور ديالو ويدير ليهم الخاطر بحال كيما كان كيدير طوني سوبرانو فالسيري الشهيرة للوز لي كان عندو فالدار.
المورفين: القفص الذهبي ديال الشهرة و الحرية الضائعة
المورفين كيقول لينا فواحد المقطع من طراك الفوندو:
“بدات كتشد فيا الهبلة طوني سوبرانو، تنخاف لنخلع الوز تنهزلو هبالو، الشهرة داتلي غي الحرية.“
أولا: “بدأت كتشد فيا الهبلة طوني سوبرانو، تنخاف لنخلع الوز تنهزلو هبالو” :
هنا المورفو كيدير إشارة لطوني سوبرانو الشخصية المافيوزية من السيري الشهيرة سوبرانوس، لي كان مربي واحد المجموعة من الوز وكيهتم بيهم واخا كان عندو صراع نفسي داخلي بين حياته كرب عائلة مافيوزية وبين دوره كأب كيحاول يعيش حياته بسلام، و لكن رغم كل الظروف كان كيدير الخاطر لداك الوز وكيخاف يموتو بالجوع أو يطيرو. و هنا إشارة من المورفين للجمهور لي عندو ولي كل فئة منهم كيبغاتو يكون، المرافن القدام بغاوه يغبر على الميديا ويرجع ليامات 2013، والمرافن الجداد لهم رأي مخالف تماما. فهنا المورفين خاص يدير الخاطر ما أمكن للوز ديالو باش ميطيرش.
والنوطة الثانية لي داير عليها الفليم ألا و هي أن “الشهرة دات لمورفين غا الحرية ” وهنا مربط الفرس.
ثانيا: الشهرة وسلب الحرية: الشهرة فالعالم اللي كنعيشو فيه اليوم ولات بحال سيف ذو حدين. من جهة كتخلي الإنسان معروف، محبوب، وعندو تأثير. ولكن من جهة خرى، كتقدر تولي قيد كيبدا يخنق حرية الفرد ويتحكم فاختياراتو وفطريقة حياتو.
كيفاش؟ الشهرة كتعني أن الناس كيراقبوك، كيتبعوك، كيبغيو يعرفو كل صغيرة وكبيرة فحياتك. وهاد التتبع كيدفع الإنسان المشهور يلبس قناع ديال “الصورة اللي الناس باغيين يشوفوها”، للي فالغالب ماشي هو فالحقيقة. هنا كتولي الحرية مزيفة، و كيتحول الإنسان لمنتوج أو ماركة.
Fundo by Lmorphine Ft. Clemando (Official Music Video) | 12 July 2025
وجهات نظر فلسفية حول الشهرة وفقدان الذات
بحال ما قال جان بول سارتر: “الآخر هو الجحيم”، لأن الآخر فحكمو عليك كيديرك سجين فتصوراتو وانتظاراتو. والمشهور كيشوف راسو يومياً من خلال عيون الناس، ماشي من خلال ذاتو. كيتحول لعبد ديال نظرة الجمهور.
وحتى ميشيل فوكو ففكرة “المراقبة و العقاب”، كيشرح كيفاش المراقبة الدائمة كتخلي الفرد يخضع بلا ما يكون سجين فعلي. المشهور عايش تحت كاميرا خفية مستمرة، وهادشي كيدفعو يراقب ذاتو بنفسو، ويمارس رقابة على تصرفاتو، وكأنو فزنزانة وهمية.
من زاوية الحرية الوجودية، الشهرة كتمس بجوهر حرية الإنسان. كيفاش؟
حيت الإنسان الحر هو اللي كيختار، اللي كيغلط، اللي كيعيش ذاتو بلا خوف من الحكم. والمشهور كيبقى دايمًا خائف: واش يعجبهم؟ واش يكرهوه؟ واش يفقد “صورته”؟ الشهرة كتمحي التلقائية، و كتقتل الصدق، وكتخلق “أنا وهمية” باش ترضي الناس. وهنا كيتبدل المعنى الحقيقي للحرية اللي تكلم عليها هايدغر، اللي هي “الوجود الأصيل.”
ألبر كامو كان كيشوف أن الحياة ما فيهاش معنى مُسبق، وأن الإنسان هو اللي خاصو يعطيها معنى. لكن الشهرة كتقدر توهمك أن حياتك عندها معنى كبير، وأنك “مهم” بزاف. وهاد الوهم كيدخلك فدوامة ديال الخوف من الفقدان ومن السقوط. المشهور كيولي عايش باش يحافظ على “صورة” ماشي باش يعيش بصدق. وهنا كيولي فصراع عبثي: باغي يحافظ على حاجة ماشي حقيقية، و هادشي كيحبسو فداك القفص الذهبي.
نيتشه كيآمن بحرية الإنسان القوي اللي كيمشي ضد التيار. لكن الشهرة كتخليك تبع التيار باش ما “تخسر الجمهور”. كتخلي الواحد يولي عبد لرأي الناس، ماشي سيد نفسو. و هدشي كيعني أن المشهور اللي ما كيقدرش يعيش حسب إرادتو، راه مجرد مقلد. الشهرة كتخلق “قطيع”، وكتقتل الفردانية اللي هي أساس الحرية حسب نيتشه.
وأخيرا الفيلسوف لي كان واقف ضد أي حاجة كنتقص من حرية الإنسان يامات اليونان وبالضبط فأثينا لي هو سقراط وما أدراك ما سقراط. سقراط كان كيشوف أن الحرية كتجي من “معرفة النفس”. لكن المشهور فالغالب كيبدا يعيش حياة ماشي ديالو، وكيهرب من راسو باش يرضي الناس. بحال إلا ما بقا عارف شكون هو. الشهرة كتحرمك من الوقت والفضاء باش “تحاسب راسك” وتعيش حياتك الداخلية.
سقراط كان يقول: “حياة بلا فحص، ما تستاهلش تتعاش”، وكيقصد بالفحص ديك اللقطة لي كتجلس فيها مع راسك وكتراجع راسك وشكون نتا وشنو كدير، والشهرة كتمنع هاد الفحص، و كتجرك لحياة سطحية، قدام الكاميرا، ماشي فداخلك.
خاتمة: قبضة الشهرة المقيدة
الشهرة ماشي ديما نعمة. مرات كتولي سجن ذهبي، كيعيش فيه الإنسان تحت الضغط، بعيد على الذات ديالو، خاضع لنظرة الآخر، وكيخسر مع الوقت حريتو وهويتو. باش يبقى الإنسان حر وسط الشهرة، خاصو يبني وعي فلسفي بذاتو، ويفرق بين صورته فعيون الناس، وبين حقيقتو. خاصو يبقى “هو” رغم كلشي.
فهاد النوطة كيما شفنا ، كيصور “المورفين” الشهرة بحالها بحال فخ كيشد الإنسان وكيخنقو، وهاد المعنى بان فالجملة: “فهاد النوطة، كيصور “المورفين” الشهرة بحالها بحال فخ كيشد الإنسان وكيخنقو، وهاد المعنى بان فالجملة: “بدات تشد فيا لهبلة طوني سوبرانو”، اللي فيها تشبيه ذاتو بطوني سوبرانو، شخصية قوية من برا ولكن محطمة من الداخل، كتعيش بين السلطة والخوف.
الشهرة كتشد عليه الحبل بحالا كيتكرفص، ماشي كتطلقو. ومن بعد كيقول: “تنخاف لنخلع الوز تنهزلو هبالو “. هنا كيعبّر على الخوف من المواجهة، من كسر الصورة اللي الناس دايرين عليه، حيت الشهرة مربوطة بحبال، وأي حركة ممكن تهدم كلشي. وفاش كيوصل لـ “الشهرة داتلي غي الحرية”، هنا كيجي بيت القصيد: الشهرة خذات منو أعز حاجة، الحرية. بحال الفلاسفة فوكو وروسو، كيبيّن لينا أن الشهرة ماشي سلطة بيدك، ولكن سلطة عليك، كتراقبك وكتحكم فيك، وكتخليك تعيش وفق تصوّر الناس، ماشي وفق حقيقتك. وبهذا الشكل، الشهرة ولات سجن ذهبي، والبريق ديالها كيغطي على القيود اللي كتجرّ معاه.
