هاذ الشهر، اختارينا كلمة التكريم أو التحية ف ثقافة الهيب هوب. التكريم هو وسيلة لروابا باش يعبرو على احترام وتقدير للرواد وهادوك اللي جا منهم الإلهام واللي حطو الساس و ساهمو فهاذ النوع الموسيقي.

والتكريم كيعبرو عليه روابا من خلال بزاف دالحوايج، منها السامبليينغ، السكراتش، الاقتباس ديال كلمات او الستيل وحتى يتعاونو مع اللي سابقينهم.

ومن الأمثلة المشهورة ديال الروابا اللي نجحو باش يستعملو التكريم ف أعمالهم فرقة وو تانغ كلان اللي ميمكنش متلقاهمش حاطين سامبلات موسيقى السول وأفلام الكونغ فو. وهادشي ماشي غي كيعطي خامة صوتية معتبرة ومغيزة، ولكن كيشيد ويكرم التأثيرات الثقافية التي طبعات هويتهم والرؤية الفنية ديالهم.

في المغرب،”ستورمي“ و”ديزي ضروس“ ايستعملو الإشارات الغنائية أو ريفيرونس باش يعطيو السلام للدراري لقدام. ستورمي، و ف”Ka3i“ جبد كازا كرو  بأغنيتهم”راني كاعي“،أما ديزي ضروس ف”إيرماكس“ عطا السلام للنورس اللي هو مول أغنية ”G*ngster Arabi“. هاذ الريفيرونسات هي مناسبة واعرة فين الدراري ديال اليوم باش يعترفو بالأثر الكبير ديال لقدام ويحييو الصلة مع التراث ديال الراب المغربي.

كيفاش يمكن نميزو بين الريفيرونس ديال الكلمات والسرقة الفنية؟ التكريم الحقيقي الأصيل كيكون عادة على شكل تقصار وأسلوب كيشبه للعمل الأصلي، الشي اللي كيعبّر على الاحترام والإعجاب بالعكس على محاولة “الهريف” على أعمال فنان آخر.