نامبر تولد من جديد: رحلة موسيقية لتمثيل الهوية الأمازيغية
مجلة ديما طوب جلست مع الرابور المغربي نامبر باش نهضرو على المسيرة الموسيقية ديالو، التزامه القوي بالجذور
الأمازيغية، والمعنى ديال المشروع الأخير ديالو.
من بعد ما توقف على الراب في 2021 لأسباب شخصية، رجع فجأة للواجهة ملي صحابو دفعو ليه باش يشارك في جام شو. “جاني لابيل باش نشارك في مسابقة راب فالتلفازة”، وهاد التجربة حس بيها بحال شي تحول. كيف قال نامبر: “تولدت من جديد دابا من بعد العودة ديالي، برؤية جديدة، ستايل جديد، وقلم جديد”. المسيرة ديالو في الموسم الأول ديال جام شو ماشي غير رجعات ليه الكاريير ديالو؛ بل بلورات المهمة ديالو: أنو يخلي تامازيغت باينة في الراب المغربي المعاصر، و يدير هادشي بأصالة مافيهاش تنازل.
هاد الإحساس الجديد بالهدف ولى هو الأساس ديال الـ EP الأخير ديالو، “Made in Tamazirt”، وهو مشروع كيعبر على الالتزام ديالو بالثقافة واللغة ديالو. لتحت، نامبر كيهضر مباشرة على المسيرة ديالو، علاش اختار يراپي بالامازيغية، والمعنى المزدوج دالعنوان ديال الـEP الجديدة.
شكون هو نامبر؟ من لخصاص حتى لـ "جام شو"، والعودة للاستوديو
سمير الساخي، اللي معروف بـ نامبر (Namber)، من منطقة لخصاص، اللي هي منطقة نائية فاقليم سيدي ايفني، بنسمة سكانية صغيرة قل من 10000 واحد. بدا يراپي في 2012 و لاح أول أغنية ديالو في 2013 فيوتيوب. حيت جاي من لخصاص، المسار ديالو كان ديما مرتبط بالجو ديال الجنوب: الشجاعة القروية والفخر الأمازيغي.
التوقف ديالو في 2021 ممكن كان يبان بحال النهاية، ولكن ديك لابيل ديال جام شو في 2024 ولات هي الرجعة. هو كي وصف التجربة بأنها فريدة من نوعها ودازت زوينة، وفخور أنه كان جزء من أول موسم ديال البرنامج. هادشي رجعو فوق الخشبة، والأهم من هادشي، وضح ليه شنو خاصو يقول وكيفاش خاصو يقولو.
Watch Namber – Yat s Yat (Official Music Video) Prod by GuccianoBeatz (from MADE IN TAMAZIRT)
علاش نامبر اختار يراپي باللغة الأمازيغية
القرار ديال نامبر باش يراپي بشكل أساسي بالأمازيغية، اللغة الأم ديال الأمازيغ، هو اختيار متعمد وشخصي بزاف. وضح أنه واخا كان كيراپي بالدارجة لسنين، لاحظ واحد الفجوة كبيرة في الساحة. “كنشوف واحد الفراغ كبير في الراب المغربي ملي كنهضرو على الروابا الأمازيغ”، كيقول. بالنسبة ليه، استعمال اللغة الأم ديالو هي مسؤولية، طريقة باش يمثل الشعب والثقافة المغربية المنسية.
الأمازيغ، أو إيمازيغن (الجمع)، هما السكان الأصليين ديال شمال أفريقيا، بتاريخ غني كيمتد لآلاف السنين. الثقافة واللغة ديالهم، تامازيغت، كانو أساس الهوية ديال المنطقة. ولكن، واجهو قرون ديال التهميش والإلغاء الثقافي. اختيار نامبر باش يراپي بالأمازيغية هو رد مباشر على هاد التاريخ، حيت كيحاول يعمر واحد المساحة اللي كيحس أنها “ما ممثلاش مزيان”.
من غير التمثيل الثقافي، الاستعمال ديال نامبر لـ تامازيغت كيعطي للكلمات ديالو عمق فريد. كشف لينا أنه عندو قاموس أمازيغي كبير، كايعرف كلمات ما بقاتش كتستعمل بزاف، وقال: “الجيل الجديد ما كيعرفهمش، غالباً غير الجدات والجدود اللي كيعرفوهم”. هاد الامتياز اللغوي كيسمح ليه يخدم كلمات عندها وزن تاريخي وثقافي كبير، وكيدير نسيج غني من المعاني اللي كتجاوز مجرد أغنية. بالنسبة ليه، ماشي غير الكلمات؛ بل المعنى ديالها. كيف كيقول: “كلماتي تقيلة حيت مشارجية بآلاف السنين ديال التراث”.
المنهج ديال نامبر كيعطي الأولوية للأصالة. كايقول أنو يكون أصيل للهوية ديالو هي حاجة أساسية. أكد أنو الا ترجم ولا قلد الآخرين غايحيد الأصالة من الموسيقى ديالو، واخا تكون بأي لغة. “أنا هو أنا، كنراپي بالأمازيغية حيت أنا أمازيغي”، كايقول. هاد الالتزام بالأصالة ماشي غير كيرجع الفن ديالو حقيقي أكثر، بل كيساعدو باش يتميز في ساحة فيها الزحام، وكيخليه فنان نادر و مهم في المشهد ديال الراب المغربي.
Watch the Jamshow soundtrack performance by the semi-finalists, Namber the only rapper raps in Tamazight
المعنى العميق وراء عنوان الايبي "Made in Tamazirt"
العنوان ديال الـ EP ديال نامبر، “Made in Tamazirt“، هو لعبة كلمات متقونة، فيها معنى مزدوج. ملي كلمة تامازيغت كاتنطق بال “ر”، كايكون المعنى هو البلاد، أو الأرض بحد ذاتها. وفي معنى آخر، ملي كاتنطق بال “غ”، كاتعني الهوية الأمازيغية، اللي كتضم اللغة و كلشي اللي صايبوه الأمازيغ. هاد المعنى المزدوج كيعكس الرسالة الأساسية ديال الـ EP: هي موسيقى من أرض الأمازيغ، وهي أيضاً إعلان أن هاد الفن مخدوم من طرف فنان أمازيغي مفتخر بالهوية ديالو.
بالنسبة لـ نامبر، هاد العنوان هو شكل من أشكال المقاومة ضد التهميش التاريخي والثقافي. هضر لينا بحماس على أهمية أن الواحد يكون فخور بالأصل ديالو، و ذكر ثقافات ضاعت بسبب الاندماج القسري، أو للأسف حيت السكان الأصليين براسهم ولاو غير فخورين ب التراث ديالهم. كيقول: “كنحارب هاد التاريخ ديال التهميش، كنحارب على قبل راسي و الناس ديالي بالفن”. الـ EP، لهذا، ماشي غير مجموعة ديال الأغاني، بل هو بيان، تأكيد قوي أن الموسيقى المغربية عندها جذور عميقة.
نامبر كيعتقد أنو من الضروري نتحداو الفكرة المنتشرة أن المغرب هو بلد عربي وصافي. كيعترف أن اللغة العربية جزء مهم من الثقافة المغربية الحديثة، ولكن كيأكد أن الأساس ديال الثقافة هو أمازيغي. الموسيقى ديالو كاتهدف باش تخلي هاد الحقيقة باينة وتشجع الناس باش يعبرو على راسهم بكل فخر بلغتهم وبالرموز الثقافية الخاصة ديالهم. “ضاروري نبين للناس أن هادي موسيقى مغربية من طرف مغاربة”، كيقول نامبر.
صوت الموراب: خلط الراب والآلات التقليدية المغربية
الرؤية الفنية ديال نامبر كتمتد حتى للصوت ديال الموسيقى ديالو براسها. وضح أن المنهج ديالو للموسيقى متعلق بالإحساس أكثر من مجرد السمع. هادشي خلاه يركز على الأصالة في كل حاجة، من الكلمات حتى للبيتس (beats). النوع اللي اختار هو “الموراب” (Morap)، وهو ستيل من الهيب هوب المغربي اللي هو “قطعة أصلية من اتصالنا بالهيب هوب العالمي”، كيف كيقول.
أحسن مثال على هادشي هو الأغنية ديالو “يات س يات”، اللي فيها آلة الرباب، وهي آلة وترية أمازيغية. نامبر وصف الاتصال العميق اللي كيحس بيه مع هاد الصوت، كيقول: “كل مرة كنسمع الرباب في بداية الأغنية، كاتجيني التبوريشة، هاد الآلة كتهضر”. بخلط للآلات التقليدية بحال الرباب والڭيمبري مع راب عصري بحال بيت ديال “بوم-باب”، كيدير خليط فريد كايفتاخر بالماضي ولكن كايزيد للقدام، وهادشي هو الأساس ديال الموراب. هاد النسيج الصوتي هو انعكاس للرسالة ديالو: أنو ممكن ترجع الحياة للتاريخ وتحتفل به بطريقة عصرية.
Watch Jam Show : Prime 3 PLUME vs NAMBER | From the tv rap competition, “rap battle” episode, Namber won this round as all the 3 jury members (ElGrandeToto, Dizzy DROS & Small X) found his performace and confident delivery superior.
تحليل للأغاني ديال "Made in Tamazirt"
العناوين ديال الأغاني في الـ EP كل واحد فيهم عندو معنى مهم، وكيزيد من العمق الموضوعي للألبوم.
تامازغا: هاد التراك، اللي العنوان ديالو كايعني “أرض الأمازيغ“، هو تحية للأهمية التاريخية والجغرافية الكبيرة ديال الأمازيغ. هاد الطراك هو الانطرو ديال الايبي، كايهضر على شنو باغي نامبر يدير والاسباب علاش.
تودارت إي تمازيغت: كتعني “تحيا تامازيغت”، هاد الأغنية هي احتفال متفائل بالهوية اللي فيها الفخر. فيها، نامبر كيراپي على أنه فخور بالجذور ديالو وكيلقى طريقة عصرية باش يرجع الحياة للتاريخ ديالو.
تاڭوت: هاد العنوان حتى هو فيه معنى مزدوج. “تاڭوت” ممكن تعني “الضباب” أو “الغرب”. الهوك ديال الأغنية، اللي الترجمة ديالو “ضباب جا من الغرب وجاب معاه الروينة“،
هو سطر قوي كيستعمل المعنى المزدوج باش يوصل إحساس بالمعاناة والألم.
يات س يات: “وحدة بوحدة”، هو تراك شخصي بزاف فين نامبر كيهضر على الصراعات الشخصية ديالو مع الحياة، الفلوس، وكلشي. الأغنية كتعبر على الصمود، إعلان أنه “مازال واقف في وجه الحياة، وعمرو ما يستسلم”.
تاودا: كتعني “الخوف”، هادي هي أكثر أغنية فيها الجعرة في الـ ايبي. نامبر كيستعمل التفاخر ماشي باش يتباهى براسو، ولكن باش يبين الصمود ديال الناس الأمازيغ اللي عاشو قرون ديال الاضطهاد. كيشوف هاد الصمود كدليل على القوة والأهمية الثقافية ديالهم اللي ما كتنساش.
اكتشف نامبر ملي كان كيحاول يترجم الكلمات ديالو لجمهور أوسع (للفرنسية والإنجليزية)، العمق والدقة ديال اللغة الأمازيغية شبه مستحيل باش تشرحو في لغات أخرى. وصف الصعوبة الكبيرة ديال الترجمة، و بين شحال ديال المعنى كاين في اللغة براسها، كيشرح “تخيل أني دوزت ساعات وأنا كنترجم كوبلية وحدة باش نلقى راسي بصفحة كاملة ديال سطور ديال الترجمة ولكن المعنى مازال ما كاملش”.
خاتمة: صوت الفنانين هو أرشيف ثقافي
بالنسبة لـ نامبر، “Made in Tamazirt” هو أكثر من مجرد EP راب؛ هو بيان فني. باستعمالو للموراب في الـ EP كامل، هو ماشي غير صايب موسيقى، بل فتح نقاش مهم على الهوية، التاريخ، والفخر.
باستعمالو للفن ديالو باش يتحدى الاحتقار الثقافي ويكرم التراث ديالو، نامبر كيصايب مساحة جديدة في الساحة الموسيقية المغربية. الخدمة ديالو كتفكرنا بقوة أن صوت الفنان ممكن يكون أداة للحفاظ على الثقافة و منارة للأجيال الجاية، كتشجعهم باش يكونو فخورين بمن هما ومنين جاو.
